ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ ଆଉ ଏକ ଝଟକା
କୋଲକାତା,୧୬ା୭: ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ ଆଉ ଏକ ଝଟକା ଲାଗିଛି । ଅଭିନେତ୍ରୀରୁ ରାଜନେତ୍ରୀ ହୋଇଥିବା ଏବଂ ପଶ୍ଚିମବଙ୍ଗର ଟିଏମସି ରାଜ୍ୟ ସଭା ଏମପି କୋଏଲ ମଲ୍ଲିକ ତାଙ୍କ ପଦରୁ ଇସ୍ତଫା ଦେଇଛନ୍ତି। କହିରଖୁଛୁ କି, କୋଏଲ ମଲ୍ଲିକ ଏପ୍ରିଲ ମାସରେ ହିଁ ଟିଏମସିର ପ୍ରତିନିଧିତ୍ୱ କରି ରାଜ୍ୟ ସଭା ଏମପି ହୋଇଥିଲେ । ଦଳରୁ ଇସ୍ତଫା ଦେବାରେ ସେ ଚତୁର୍ଥ ଏମପି । ତାଙ୍କ ପୂର୍ବରୁ ଅନ୍ୟ ତିନି ଜଣ ଏମପି ଦଳ ଛାଡିସାରିଛନ୍ତି ।
ଟିଏମସି ରାଜ୍ୟସଭା ଏମପି କୋଏଲ ମଲ୍ଲିକ ଉପରାଷ୍ଟ୍ରପତିଙ୍କୁ ଭେଟି ତାଙ୍କର ଇସ୍ତଫାପତ୍ର ପ୍ରଦାନ କରିଛନ୍ତି। କୋଏଲ ମଲ୍ଲିକଙ୍କ ଇସ୍ତଫା ପରେ, ରାଜ୍ୟ ସଭାରେ ତୃଣମୂଳ କଂଗ୍ରେସ (ଟିଏମସି) ଏମପିଙ୍କର ସଂଖ୍ୟା ନଅକୁ ହ୍ରାସ ପାଇଛି।
କୋଏଲ ମଲ୍ଲିକ ଜଣେ ଲୋକପ୍ରିୟ ଟଲିଉଡ୍ ଅଭିନେତ୍ରୀ। ତାଙ୍କ ଇସ୍ତଫାକୁ ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପାଇଁ ଆଉ ଏକ ଝଟକା ଭାବରେ ଦେଖାଯାଉଛି। ବୁଧବାର ଦିନ ଦଳର ନେତା ମଦନ ମିତ୍ର ମଧ୍ୟ ମମତାଙ୍କ ଠାରୁ ଅଲଗା ହୋଇ ଋତବ୍ରତ ଶିବିରରେ ଯୋଗ ଦେଇଥିଲେ । ଆଜି ଏମପି କୋଏଲ ମଲ୍ଲିକ ରାଜ୍ୟ ସଭାରୁ ଇସ୍ତଫା ଦେଇଛନ୍ତି ।
କୋଏଲ ମଲ୍ଲିକଙ୍କ ପ୍ରକୃତ ନାମ ରୁକ୍ମିଣୀ ମଲ୍ଲିକ। ସେ ଜଣେ ପ୍ରସିଦ୍ଧ ବଙ୍ଗୀୟ ଅଭିନେତ୍ରୀ, ମୁଖ୍ୟତଃ ଟଲିଉଡ୍ର “ଟଲି-କ୍ୱିନ୍” ଭାବରେ ଜଣାଶୁଣା।
ରାଜ୍ୟ ସଭା ଅଧ୍ୟକ୍ଷ ସିପି ରାଧାକୃଷ୍ଣନଙ୍କୁ ଲେଖିଥିବା ଏକ ଚିଠିରେ କୋଏଲ ମଲ୍ଲିକ କହିଛନ୍ତି ଯେ ସେ ତାଙ୍କ ପଦରୁ ଇସ୍ତଫା ଦେଉଛନ୍ତି ଏବଂ ଇସ୍ତଫା ଗ୍ରହଣ କରିବାକୁ ଅନୁରୋଧ କରିଛନ୍ତି । ସେ ରାଜ୍ୟ ସଭାର ସମସ୍ତ ଅଧିକାରୀ ଏବଂ ସଦସ୍ୟଙ୍କ ପ୍ରତି କୃତଜ୍ଞତା ମଧ୍ୟ ପ୍ରକାଶ କରିଛନ୍ତି।
