ଫିନଲ୍ୟାଣ୍ଡରେ ନିଖୋଜ ହାଇଦ୍ରାବାଦ ଛାତ୍ରଙ୍କ ମୃତଦେହ ଉଦ୍ଧାର
ହାଇଦ୍ରାବାଦ: ଫିନଲ୍ୟାଣ୍ଡରେ ଗତ ଦୁଇ ମାସ ହେଲା ନିଖୋଜ ଥିବା ହାଇଦ୍ରାବାଦର ଜଣେ ୧୮ ବର୍ଷୀୟ ଛାତ୍ରଙ୍କ ମୃତଦେହ ସମୁଦ୍ରରୁ ଉଦ୍ଧାର ହୋଇଛି। ମୃତଦେହ ଉଦ୍ଧାର ହେବା ପରେ ଛାତ୍ରଙ୍କ ପରିବାର ଏହାକୁ ସନ୍ଦେହଜନକ ଘଟଣା ବୋଲି କହି ତଦନ୍ତ ଦାବି କରିଛନ୍ତି। ମୃତ ଛାତ୍ରଙ୍କ ନାମ ମନିଦୀପ୍ ରେଡ୍ଡୀ ବୋଲି ଜଣାପଡ଼ିଛି। ତାଙ୍କୁ ଶେଷ ଥର ପାଇଁ ମେ ୫ ତାରିଖରେ ହେଲସିଙ୍କିର ଏକ ମଲ୍ରେ ଦେଖିବାକୁ ମିଳିଥିଲା। ମନ୍ଦୀପଙ୍କ ପାରବାରିକ ଓକିଲ କହିଛନ୍ତି, ରେଡ୍ଡୀଙ୍କ ମୃତ ଶରୀର ଶନିବାର ସମୁଦ୍ରରୁ ଉଦ୍ଧାର କରାଯାଇଛି। ରେଡ୍ଡୀ ଫିନଲ୍ୟାଣ୍ଡର ଲାପେନେରାଣ୍ଟା-ଲାହତି ଟେକ୍ନୋଲୋଜି ବିଶ୍ୱବିଦ୍ୟାଳୟି (ଏଲ୍ୟୁଟି) ଲାହତି କ୍ୟାମ୍ପସରେ ସଫ୍ଟୱେର୍ ଓ ସିଷ୍ଟମ୍ ଇଞ୍ଜିନିୟରିଂରେ ସ୍ନାତକ କରୁଥିଲେ।
ମନଦୀପ୍ଙ୍କ ବାପା ଜି ମୁଥ୍ୟମ୍ ରେଡ୍ଡୀ ମଧ୍ୟ କହିଛନ୍ତି ଯେ, ସେ ଶେଷଥର ପାଇଁ ମେ ୫ ତାରିଖରେ ତାଙ୍କ ପୁଅ ସହିତ କଥା ହୋଇଥିଲେ। ମୁଥ୍ୟମ୍ ରେଡ୍ଡୀ କହିଛନ୍ତି, ତାଙ୍କ ପୁଅ ସେହିଦିନ କିଛି ଟଙ୍କା ମାଗିଥିଲେ। ତାଙ୍କ ପତ୍ନୀ ମମତା ତାଙ୍କୁ ଅନଲାଇନ ମାଧ୍ୟମରେ ଟଙ୍କା ଦେଇଥିଲେ। ତା’ପରଠାରୁ ପୁଅ ତାଙ୍କମାନଙ୍କ ସହିତ ଆଉ ଯୋଗାଯୋଗ କରିନଥିଲେ। ରେଡ୍ଡୀଙ୍କ ପରିବାର ମଧ୍ୟ ଏହି ମାମଲାରେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ତେଲେଙ୍ଗାନା ହାଇକୋର୍ଟ କେନ୍ଦ୍ର ଓ ରାଜ୍ୟ ସରକାରଙ୍କୁ ଛାତ୍ରଙ୍କ ସନ୍ଧାନ କରିବାକୁ କହିଥିଲେ। ମନଦୀପ୍ ଜଣେ ବନ୍ଧୁଙ୍କ ସହିତ ମିଶି ଫିନ୍ଲ୍ୟାଣ୍ଡରେ ଯେଉଁଠାରେ ରହୁଥିଲେ ସେହି ସ୍ଥାନଠାରୁ ୧୦୦ କିମି ଦୂରକୁ ଯାଇଥିବା ପୁଲିସ ପରିବାରକୁ ସୂଚନା ଦେଇଛି। ବନ୍ଧୁ ଓ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କ ସହିତ ପଚରାଉଚରା ପରେ ବି ମନଦୀପଙ୍କ ସମ୍ପର୍କରେ କିଛି ତଥ୍ୟ ମିଳିନଥିଲା।
